Urtarrilaren 16an, 75 urte betetzen dira Jesus Carrera Olaskoaga buruzagi komunista fusilatu zutela. Atxilotua eta, 153 egunez, egunero torturatua izan ostean, Alcalá de Henares-ko hilerrian fusilatu eta bertako 38. fosan hilobiratu zuten.
Ogibidez igeltseroa zen hondarribitar hau eta UGT zein Alderdi Komunistako kidea zen. Gerra Zibilean, horniketa eta garraio sekzioan jardun zuen. Irun eta Donostia erori ostean, Durangora joan eta “Gernikako Arbola” batailoi komunistan borrokatu zuen. Bertako komandante izatera iritsi zen, 140 gudariren ardura hartuz.
Gerra ostean, Frantzian erbesteratu zen, Gurs eta Rivesalteseko errefuxiatuen esparruetan. 1941an, Madrilera itzuli zen, Alderdi Komunistaren erresistentzia antolatzera, frankistek Jesus Larrañaga eta Manuel Asarta atxilotu eta fusilatu ostean.
1943ko martxoaren 15ean, Santiago Goñi eta Angeles Arrutirekin zegoela atxilotu zuten. Segurtasun Zuzendaritzan, Madrilgo Puerta del Sol-en bost hilabetez torturatu eta Alcalá de Henares-ko gartzelera eraman zuten.
Urtarrilak 16
Manuel de la Escalerak “Muerte después de reyes” egunkari pertsonalean kontatzen duenez, Jesus Carrera alderdiko beste zazpi kiderekin gauerdian eraman zuten. “Pausoak eta ate irekitzeak entzuten ziren. Hiruak ziren eta gauerdiko kontaketa, ordu-batak baino lehen egin zuten. “Saca” izango ote zen? (…) Lauak arte ez zuten lehen atea ireki. Unean, “Gora Errepublika” eta gora alderdia oihuak entzun ziren. Irmotasun osoz, Jesus Carreraren ahotsa zen.”
Goizeko seiterdietan fusilatu zuten Carrera, Alcalá de Henareseko hilerrian eta bertako 38. fosan hilobiratu zuten Alderdi Komunistako beste hainbat kiderekin batera.
